Agparparikut ita dagiti negosyante partikular dagiti agilaklako kadagiti nagduduma a food ken non food products-da iti Burnham Park gapu iti sasaaden ti panawen.
Iti pannakiuman ti Bombo Radyo kadagiti food vendors, kinunanda nga awan unay ti agturturong iti Burnham Park isu’t gapuna a saan a malako dagiti produkto dagitoy.
Sigun pay kadagitoy, adda pay dagiti dadduma a gundaway a nu napigsa ti angin ket mabasa dagiti produkto dagitoy.
Malaksid iti dayta, dagiti kangrunaan metlaeng nga agparparikut ita ket dagiti ice cream vendor.
Gapu iti nalam-ek a panawen, awan unay dagiti gumatang kadagiti lakoda.
Nupay adda latta dagiti gumatang ngem aklonenda a natumal latta ti pananglakoda iti agdama.
Iti baet ti nasao a banag, inkarida nga ituloyda latta ti panagilako agsipudta daytoy ti kangrunaan a pagsapulanda iti tunggal aldaw.
Malaksid kadagiti food vendors, agparparikut metlaeng dagiti flower vendors partikular iti orchidarium gaputa kas iti parikut dagiti food vendors, ad-adda nga awan metlaeng ti apan agbisita iti puesto dagitoy a gumatang kadagiti nagduduma a sabong a lakoda.
Mangnamnama met latta dagitoy a nu sumayaat ti panawen ket idiayda met a makasubbot wenno makabawi iti kita dagitoy.
