BAGUIO CITY – Saan pay a maipatungpal sadiay La Trinidad, Benguet ti “No Bakuna, No Biyahe” a polisiya.
Sigun kenni Mayor Romeo Salda, adalenda pay a nalaing no ipatungpalda ti nasao a polisiya ken no nasken nga adaptarenda daytoy manipud iti siudad ti Baguio.
Kinunana nga agbalin a basaranda ti Baguio City no napintas ti epekto wennu pagbanagan ti nasao a polisiya sakbayda nga ipatungpal kadagiti drivers dagiti parapubliko a lugan nga agbibiahe sadiay La Trinidad.
Innayonna a saan pay nga imbilin ti nasyonal a gobierno ti kapilitan a panagpabakuna isut gapuna a saanda pay nga ipatungpal ti “No Bakuna, No Biyahe” gaputa nasken a nainget a matingiting daytoy.
Nupay kasta, kinunana nga iti agdama ket manarimaan paylaeng ti panagpabakuna dagiti dadduma a drivers dagiti parapasahero a lugan sadiay, no sadino, puntiryada ti 70% a vaccination rate inton sumaruno a bulan ti Disyembre kadagiti drivers dagiti parapasahero a lugan sadiay.
Inyunay-unayna a napateg ti panagpabakuna dagiti nasao a drivers gaputa nagduduma nga indibidual ti makasang-sango dagitoy iti tunggal panagbiahe dagitoy.
Maipalagip nga iti panangipatungpal ti Baguio LGU iti “No Bakuna, No Biyahe” kadagiti amin a parapasahero a lugan nga ummuneg iti siudad ket nagpabakuna dagiti dadduma nga drivers gaputa saanda a makauneg iti Baguio no awan ti maipakitada a vaccination card a mangpaneknek a dagitoy ket nabakunaanen kontra iti COVID-19.
