Agtultuloy nga idiaydiaya ti Baguio City Health Services Office ti libre a “no scalpel vasectomy” kadagiti lallaki a kayatda nga agkontrol.
Imbinglay ni Baguio City Health Services Medical Officer Dr. Nelcon Hora a ti ipatpatungpalda a klase ti vasectomy ket ti “no scalpel” wenno ti saan a panagusar iti aniaman a surgical instrument bayat ti proseso.
Ti vasectomy ket maysa a family planning option para kadagiti lallaki wenno kadagiti amma a kayatda nga agkontrol.
Inlawlawag ni Dr. Nelcon Hora a nalaklaka itan ti vasectomy gapu ta saanen a kasapulan ti medical clearances ken saan a ma-admitar dagiti pasiente nu idilig kadagiti kallabes.
Innayonna pay a ti kasapulan laeng ket bassit nga anesthesia bayat ti proseso ti “no scalpel vasectomy.”
Dinakamatna a sangapulon a tawen nga idiaydiayada ti nasao a serbisyo nu sadino nakitada ti ngumatngato a bilang dagiti lallaki a dumaldalan iti no scalpel vasectomy gapu ta dumandanon iti uppat agingga lima a pasiente iti tunggal bulan nu idilig kadagiti napalabas a tawtawen.
Inyunay-unay met ni Dr. Hora a saan a basta-basta ti panagpavasectomy gapu ta permanente daytoy rason a kasapulan a dumalan dagiti pasiente iti counseling nu desidido dagitoy nga agpaisidong nangruna nu awan pay ti anak dagitoy.//Bombo Karen Sapirao
