BAGUIO CITY – Nabigbig ti kinalaing ti non-uniformed personel (NUP) manipud iti Baguio City Police Office iti naangay a Search for Best NUP iti Philippine National Police a tinnawen nga aktibidad ti PNP tapno mabigbig ti contribution dagiti NUP iti pulisya.
Nagun-od ni Mischelle Junio manipud iti crime registrar ti BCPO station 8 ken ti BCPO head quarters ti maikadwa a pwesto manipud kadagiti sangapulo ket walo a rehiyon iti pagilian.
Sigun kenkuana, daytoy ti kaunaan a gundaway a naiyendorso ti rehiyon para iti nasao a kompetisyon iti maikalima a tawen ti panagserbi daytoy iti PNP.
Sipapannakkel met daytoy iti panakabigbig ti kontribusyonna uray saan daytoy naka-uniporme a kameng ti PNP.
Ni Junio ket napili gapu kadagiti accomplishment a naaramid daytoy idi tawen 2016 kas crime registrar iti programa ti kapulisan.
Kinunana a kas maysa a crime registrar ket dagitoy ti mangar-aramid iti crime analysis nga araramaten ti pulisya a basaran para iti intervention plans.
