BAGUIO CITY – Nakemmeg ti napeklan a drug pusher ken high-value target ti pulisya iti buy-bust operation nga insayangkat dagiti operatiba sadiay Poblacion, La Trinidad, Benguet idi kanikadua.
Nabigbig daytoy a ni Rochester Chayao Dagiw-a alyas Betyeng, 33-anyos, tubo ti Buguias, Benguet ken residente ti Buyagan, Poblacion, La Trinidad, Benguet.
Nakumpiskar kenkuana ti maysa a pakete ti mapapati a shabu ken ti cellphone nga inaramatna iti transaksion bayat a narekober kenkuana ti naaramat a buy-bust money.
Sumangsango ita ni Dagiw-a iti kaso a panaglabsing iti Comprehensive Dangerous Drugs Act of 2002.
Sigun iti pulisya, nagramut ti operasyon iti kiddaw iti social media seknan iti panag-aksion ti pulis iti panakakemmeg ti alyas Betyeng a maatap nga agar-aramat kadagiti menor de edad manipud kadagiti pagadalan tapnu agiwaras ti iligal a droga iti probinsia.
Dagus a nangisayangkat ti Benguet Police Provincial Office iti surveillance agingga iti buy-bust operation, no sadino, saan a limmaban ni Dagiw-a idi nakemmegen daytoy.
Napaneknekan iti imbestigasyon ti panangilako ni Dagiw-a iti iligal a droga sadiay La Trinidad ken iti dadduma a munisipyo ti Benguet ken nagar-aramat daytoy kadagiti estudyante kadagiti transaksionna.
Nabigbig ni Dagiw-a kas maysa kadagiti nabatbati a drug distributors iti Benguet.
Gapu iti daytoy, ibalbalakad ti pulisya ti panangtulad ti publiko iti inaramid ti indibidual a nangipablaak iti nasao nga isyu a nagresulta iti panakakemmeg ti maseknan a drug personality.
