BAGUIO CITY — Sumangsango ti University of Baguio (UB) iti maysa nga alegasion iti maysa nga estudiante a nakapasar iti sexual assault manipod iti maysa a kameng iti faculty.
Rimmuar ti pammabasol iti maysa nga anonymous nga open letter a naipablaak iti Facebook group nga Arteks of Lakandula idi Agosto 4, 2026.
Iti nasao a post, kinuna iti saanen a nagpabigbig a nagsurat a daytoy ket mapapati a nirames iti maysa a propesor.
Mapapati a ti mairekreklamo a propesor ket kameng iti College of Education wenno School of Teacher Education and Liberal Arts iti unibersidad ken karaman metlaeng kadagiti aktibidad iti sports.
Saan a naipablaak iti publiko ti kinasiasino iti nagsurat ken ti mairekreklamo a manursuro.
Maibasar pay iti post, sumagmamano a bulan a nakapasar daytoy iti nakaro a “guilt” ken panangpabasol iti bukodna a bagi sakbay a nangngeddeng nga ibutaktak iti publiko ti mapapati a napasaranna.
Kinuna pay iti nagsurat nga adda pay iti dadduma nga estudiante ti mapapati a nakapadas iti harrassment manipod iti kapada a manursuro ken naipadamag daytoy idi iti administrasion iti unibersidad, ngem mapapati a saan a narisut wenno nasungbatan.
Nupay kasta, awan ti maimatangan a kakuyog iti alegasion a kas kadagiti dokumento wenno aniaman pay nga ebidensia a mangpaneknek iti alegasion.
Iti met official statement iti University of Baguio iti nasao nga aldaw, kinunana nga ammoda ti nasao a post ken bigbigbigenda ti kinadagsen iti alegasion.
Impetteng iti unibersidad a ti kangrunaan a prayoridad daytoy ket ti kinatalged, dignidad, ken pagimbagan iti indibidual a nangibinglay iti kapadasan ken nakasagana iti unibersidad a mangipaay iti kaskenan a suporta.
Impasigurado met iti unibersidad kadagiti estudiante, manursuro, kameng, alumno, ken iti publiko a ti amin a report maipapan iti sexual violence, harassment, panangabuso, ken animanan a kita iti panangibales ket sangwenda nga addaan iti dagos a panagtignay, addaan iti confidentiality, addaan iti kinasensitibo, ken patas iti proseso.
Nupay kasta, inlawlawag iti unibersidad nga agingga iti agdama ket awan pay ti naawatda a pormal a reklamo seknan iti partikular nga alegasion a naibinglay iti social media.
Iti baet dayta, impaganetget iti unibersidad a ti panangilawlawagda ket saan a kayatna a sawen a mapagduaduaan wenno saan a maikankano ti naibinglay a kapadasan, nu diket panggepna laeng nga ilawlawag ti agdama nga estado iti nasao nga isyu.
Inkari met ti unibersidad a mangisayangkatda kadagiti addang tapno makontak ti indibidual nga adda iti likudan iti post tapno maipaayan daytoy iti tulong, proteksion, ken maipasidong iti umno a proseso iti institusion.
Bigbigbigen pay iti administrasion nga adda dagiti nainkalintegan a rason nu apay nga agduadua a mangipila iti reklamo dagiti survivor.
Gapu iti daytoy, guygoyugoyen ti unibersidad dagiti karaman, wenno siasinoman a tumultulong kenkuana, a makikoordinar iti maysa a mapagtalkan nga opisina iti unibersidad, faculty member, guidance counselor, wenno dadduma pay a support channel nu sadinno daytoy a makarikna iti seguridad.
