Nagpakdaar ti National Telecommunications Commission (NTC) iti publiko kontra iti short message service (SMS) a mangitantandudo iti sumagmamano a kandidato iti eleksion a naipatulod babaen kadagiti emergency alert systems.
Iti statement, kinuna ti National Telecommunications Commission a ti mensahe ket maipatpatulod babaen ti “feature” nga available iti sumagmamano nga “SMS blasters” nga agar-aramat ti cell broadcast wenno flash SMS option a masarakan iti software controlling SMS blaster machines.
Imbalakad ti nasao a komision a saanda nga ikankano dagiti mensahe a naawat iti sidong ti emergency broadcast facility malaksid no lehitimo a mensahe ti emergency a nagtaud iti National Disaster and Risk Reduction and Management Council (NDRRMC) wenno iti PAGASA Weather and Flood Forecasting Center.
Naireport metten ti saan a nasayaat a panagaramat ti emergency broadcasts kadagiti maseknan nga otoridad, sigun iti nasao a komision.
Itay laeng nabiit, adda gamin ti report a naawat ti maseknan nga ahensia a maysa a resident ti Masbate ti nakaawat ti emergency alert a naglaon ti mensahe a mangguyguyuguy nga ibotos dagiti saanen a nainaganan a kandidato iti kina-gobernador, bise gobernador, mayor, district representative iti masungad a May midterm elections.
