Nangiruwar ti Office of Civil Defense (OCD) iti pakdaar iti publiko partikular dagiti residente ti Metro Manila ken kadagiti kabangibang a luglugar nga agaramat dagitoy iti face mask gapu iti napuskol nga asok a manipud iti forest fire idiay Kalimantan, Indonesia.
Sigun kenni OCD Deputy Administrator Assistant Secretary Raffy Alejandro, ti nasao nga asok ken manipud iti napasamak a wildfire idiay Indonesia.
Gapu iti daytoy, binilinda metlaengen dagiti nagduduma a local government unit (LGU) a mangiruwar iti bukodda nga abiso.
Sigun iti report, naobserbaran ti napuskol nga asok manipud Antipolo City, Rizal itay 5:48 ti agsapa ita nga aldaw.
Inlawlawag met ti Department of Environment and Natural Resources–Environmental Management Bureau (DENR-EMB), nga agtultuloy a bambantayanda ti air quality dagiti apektado a lugar, nangnangruna idiay National Capital Region (NCR), CALABARZON, ken MIMAROPA.
Iti agdama, agtultuloy ti panangadal dagiti otoridad iti lebel ti polusyon ken kapuskol ti asok tapno mapagsaganaan ti agbalin nga epekto daytoy iti salun0at ken aglawlaw.
