Naituding ti nation wide school vaccination program para kadagiti publiko nga eskuelaan inton Oktubre a siete, sigun iti Department of Health (DOH) idi kalman, September 17, 2024.
Paset ti nasao nga addang ti panagregget ti gobierno a mangparang-ay iti national immunization campaign para kadagiti ubbing.
Iti nasao a programa, maitukon kadagiti estudiante manipud Grade 1 agingga iti Grade 7 ti bakuna para iti human papillomavirus (HPV), kamuras, rubella, tetanus ken diphtheria.
Maipangpangruna a maipaay ti human papillomavirus vaccines kadagiti estudiante a babbai iti Grade 4 tapno malapdan ti potensial a cervical cancer kadagitoy.
Sigun iti Department of Heath, panggepda a mabakunaan ti 2 milion nga ubbing iti pagilian ita a tinawen.
Iti agdama, agarup 1.32 milion nga ubbing paylaeng ti saan pay a nabakunaan ita a tawen.
Nupay kasta, saan a mandatory ti nasao a vaccination program.
