BAGUIO CITY – Naibilin ti panakairikep ti dua nga isolation facilities ti Baguio kasaruno ti naobserbaran a panagbaba ti occupancy rate dagitoy.
Sigun kenni Mayor Benjamin Magalong, dagitoy ket ti Teacher’s Camp Isolation Facility ken ti maysa nga isolation facility nga adda ti sidong ti Oplan Kalinga.
Kinunana a mairikep dagiti nasao a pasilidad apaman a makompleto ken agleppas ti isolation dagiti indibidual nga agtaltalinaed sadiay.
Dinakamatna a no mairikep dagitoy ket maksayan ti baybayadan ti siudad.
Maibasar iti datus, 18% ti occupancy rate ti Baguio City kalpasan a bimmaba ti kaso ti COVID-19 iti lokalidad.
Naipasidong metten ti Baguio iti Alert Level 3 mangrugi ita nga aldaw ngem agtalinaed latta dagiti immunan a naipaulog a pagalagadan kontra iti COVID-19.
