Impablaak ti Department of Education (DepEd) a rugiandan ti mangisayangkat iti baro a programa ita a Nobiembre tapno mapabassit ti learning loss dagiti estudyante a naapektaran iti bagyo ken dadduma pay a natural a didigra.
Sigun iti nasao nga ahensia, nabukel ti Dynamic Learning Program (DLP) initiative a mangrisut ti pannakasinga dagiti klase gapu ti natural a didigra ken dadduma pay a pakaseknan babaen ti panangitandudo dagitoy iti “independent” ken “resource-efficient learning.”
Babaen iti nasao nga addang, dagiti naapektaran a pagadalan ket addaan kabaelan a mangisayangkat iti “make-up classes” ken maaramat ti Dynamic Learning Program learning activity sheets kadagiti temporario a pagadalan.
Naaramid dagiti activity sheets a “simple, targeted, ken adaptable.”
Mangrugi ti pannakaimplentar daytoy ita a Nobiembre kadagiti naapektaran a pagadalan a kas iti Ilocos Region, Cagayan Valley, Central Luzon, Calabarzon, Bicol Region, ken Cordillera Administrative Region.
Ti pannakaimplementar ti Dynamic Learning Program ket maitunos iti direktiba ni President Ferdinand “Bongbong” Marcos Jr. a maadaan iti aktibo ken agtultuloy a panagadal dagiti studiante bayat ti didigra ken saan a nasayaat a sitwasion.
Dumanon iti 3,970,222 learners ken 181,270 teaching ken non-teaching personnel ti naapektaran iti agarup 10,000 a pagadalan iti Pilipinas gapu iti Super Typhoon Leon.
Daytoy ket kas maibasar iti naiparangarang a partial data ti Department of Education (DepEd).
Malaksid iti dayta, dumanon iti P396 milion a balor ti nadadael nga imprastruktura— P282.50 milion ti kasapulan para iti pannakaibangon manen dagiti siled-pagadalan ken P113.50 milion para kadagiti dadakkel a pannakatarimaan.
Kabayatanna, dumanon met iti P3.7 billion a balor ti nadadael a pagadalan manipod iti datos idi Oktubre 28 gapu iti Severe Tropical Storm Kristine.
Nakaapektar pay daytoy iti agarup 19 milion nga studiante iti 38,333 a pagadalan iti Pilipinas.
