BAGUIO CITY- Naikkaten iti pwesto ti opisyal ti Land Transportation Office (LTO)-Baguio kalpasan a nagmaneho nga addaan iti impluwensiya ti arak a nangitunda iti aksidente idi June 10, 2025.
Daytoy ti aksion nga imbilin ni Department of Transportation (DOTr) Secretary Vince Dizon kalpasan nga inawatna ti impormasion kenni Baguio City Mayor Benjamin Magalong.
Gapu iti dayta, dagus nga imbilinna ti pannakaikkat iti pwesto ni Engr. Edilberto Bungaoen idi June 13, 2025.
Sigun kenni Dizon, “unacceptable” ti inaramid ni Bungaoen agsipudta maysa nga opisial ti LTO a rumbeng nga agtungpal iti linteg ken maysa a pagwadan.
Maipalagip nga immunan a nasuspindir ni Bugaoen iti pwesto kalpasan a nangipaulog ti Central Office ti Department of Transportation iti show cause order kontra iti 64-anyos nga opisyal ti LTO-Baguio.
Iti immuna nga interview ti Bombo Radyo, kinuna ni PBGen. Glen Dumlao, Regional Director ti Department of Transportation (DOTr)-Cordillera a ti nasuspendir nga opisyal ket kaidesdesignar laeng iti siudad ti Baguio ken naituding nga agretiro inton umay a tawen. Dinakamat ni Dumlao a maysa daytoy a career officer ken iggemna ti posisyon kas Senior Transportation Regulation Officer. Iti agdama ket adda metten ti dinukutanda nga agserbi pailaeng kas Officer-In-Charge ti nasao nga opisina. //mp4
