BAGUIO CITY- Agtultuloy ti “Oplan Galugad” nga ipatpatungpal ti Philippine Drug Enforcement Agency- PDEA Cordillera kadagiti nagduduma a pagbaludan iti rehion.
Iti interview ti Bombo Radyo Baguio kenni PDEA-CAR Regional Director Gil Castro,kinunana a mandatoda nga agwanawan kadagiti Provincial Jails tapno maduktalan nu adda dagiti mangiserserrek ken mangiruruar ti iligal a droga iti uneg ti pagbaludan.
Kinunana a kaudian a tinarungda ti Abra Provincial Jail nu sadino awan ti nasukimatda a presentia ti droga ken deadly weapon.
Inayonna a nagnegatibo ti resulta dagiti amin a personnel ken balod a nagpasidong iti drug testing.
Dinakamatna a 40% agingga 60% a balud iti Abra Provincial Jail ket addaan ti kaso nga adda pakainaiganna iti iligal a droga partikular ti panagaramat ken panangilakoda ti shabu.
Iti baet daytoy, impettengna a dagiti nakumkumpiskar a shabu kadagiti nagduduma a probinsia wenno municipio iti Cordillera ket saan a bin-ig nga agtataud sadiay Abra.
Iti datus ti ahensia, adda latta dagiti sumagmamano a barangay sadiay Abra a saan pailaeng a naideklara kas drug free gaputa adda pailaeng dagiti drug personality dagitoy a saan a natiliw ken adda pailaeng dagiti saan a nagpaisidong iti community base drug rehabilitation.
