Impakaamo ti Korte Suprema a naitantan dagiti oral arguments iti petision a mangkarit iti constitutionality ti 2025 General Appropriations Act kalpasan nga impalubos ti Korte ti “motion for consolidation and resetting” nga impila ti Office of the Solicitor General.
Ti oral arguments ket orihinal a naituding iti Mayo 19 tapno mapagsasaritaan ti petision nga impila ni sigud nga executive secretary Vic Rodriguez tapno maideklara nga “unconstitutional” ti P6.326 trillion national budget para iti agdama a tawen.
Iti “notice” wenno pakaammo a napetsaan iti Mayo 6, kinuna ti Korte Suprema a maangay dagiti oral arguments iti “maudi a petsa,” a maibasar iti kanayonan a pakaammo manipud iti Korte.
Sigun iti nasao a korte, ti “motion for consolidation and resetting” nga impila ti OSG ket mangkidkiddaw iti Korte nga ibilinna kadagiti nangipila a kas kenni Vice Rodriguez ken dagiti kakaduana kasta metten ti 1Sambayan Coalition ken ti Teacher’s Dignity Coalition ket maikeddeng ti oral argument inton May 27 wenno iti dadduma a petsa.
Kabayatanna, nangipila ti Office of the Solicitor General iti motion for clarification a mangkidkiddaw ti pammalawag nu makipaset iti oral arguments da Senator Grace Poe ken Marikina Representative Stella Quimbo kas Senate Finance Committee ken House Committee on Appropriations kas resource persons.
Kinuna dagiti nagpetision a napaay ti GAA a mangipaay iti mandatory funding para iti PhilHealth, saan a nainkalintegan a panangipangato kadagiti appropriations iti labes ti naisingasing a badyet ti Presidente, panangipangpangruna ti panaggasto iti imprastruktura ngem iti edukasion, ken nairaman pay dagiti blangko a banag iti report ti bicameral conference committee.
