BAGUIO CITY – Ipalpalagip ti Sangguniang panglungsod iti Baguio City ti Ordinance No. 8-2011 wenno regulasyon iti panaglako ti over-the-counter weight loss supplements kadagiti menor de edad.
Nailanad iti ordinansa ti panakipataw ti multa kadagiti indibidual wenno establishimento a maduktalan nga aglablabsing iti ordinansa.
Asinuman nga indibidual wenno business establishments nga addaan iti permit nga aglako iti over the counter a pampakuttong ket nasken a mangipaskil ti pakdaar a maipawil daytoy kadagiti ubbing wenno menor de edad nga agtawen iti 17 agpababa.
Masitar wenno mabagaan dagiti aglabsing para iti 1st offense bayat a mamulta iti agarup P30-K wenno panakaibalud a saan nga sumurok iti 3 bulan ti 2nd offense ken P3-K agingga P5-K a multa ken panakaibalud iti 3 a bulan agingga 6 a bulan para iti 3rd offense.
Posible pay a mawaswas wenno makanselar ti permit to operate dagiti business establishment nu aglabsingda agingga iti maikatlo a gundaway.
Ti nasao nga ordinansa ket mangsupsuporta iti Article 13, Section 12 ti 1987 Philippine Constitution a mangibilbilin iti namintinir nga food and drug regulatory system ken panakaipayulog dagiti aksion ken pangngeddeng iti panagresponde ti parikot ken pagkasapulan mainaig iti salun-at.
