BAGUIO CITY – Maisayangkat iti Baguio Convention Center ti panagpila ti certificate of candidacy (COC) dagiti agkandidato iti siudad ti Baguio para iti 2022 national and local elections.
Iti interview ti Bombo Radyo Baguio, kinuna ni COMELEC-Baguio Election Officer Atty. John Paul Martin a daytoy ket gaputa kombiniente ken nalawlawa ti nasao a pasilidad para iti panag-awatda ti COC inton October 1-8.
Imbinglayna a mangibangondan to ti triage a dumalanan amin dagiti sumrek iti convention center kabayatan ti nasao a panawen ken agikabilda pay ti media booth iti uneg para kadagiti kameng ti media a kayatda ti mang-interview kadagiti agipila ti COC.
Innayonna a malimitaran dagiti supporters a mangkadwa kadagiti kandidato no sadino, dua laeng a supporters ti mabalin a mangkadwa iti maysa a kandidato nga addaan ti partido-pulitikal bayat a maysa laeng a supporter no ti kandidato ket independent.
Sigun pay kenni Atty. Martin, mangbigbigda metlaeng ti agserbi a holding area iti entrance ti convention center tapnu dagiti kandidato ket saanda nga aggigiddan nga agturong wenno sumrek iti center stage a pag-awatan ti COMELEC-Baguio iti COC.
Dinakamatna met nga uray dagiti supporters nga agbati it ruar ti convention center ket nasken nga agtulnogda latta iti social distancing.
Mangnamnama daytoy a babaen iti nasao a plano ket agbalin a naannayas ken organisado ti panagpila dagiti kandidato iti COC malaksid pay a matungpal amin a health protocols kontra iti COVID-19.
