TUBA, BENGUET – Overloading ti maysa a makitkita dagiti otoridad a rason iti napasamak nga aksidente iti paset ti Marcos Highway idiay Barangay Taloy Sur, Tuba, Benguet idi Sabado, Mayo 30, 2026.
Sigun iti Tuba Municipal Police Station, limmabes ti carrying capacity ti Victory Liner ordinary bus a karaman iti nasao nga aksidente.
Nupay, agtultuloy latta ti imbestigasyon dagitoy tapno maduktalan dagiti dadduma pay a rason ti road crash.
Kabayatanna, dua pulo ket innem a unit ti Victory Liner ti sinuspendir ti Land Transportation Franchising and Regulatory Board (LTFRB) gapu iti napasamak.
Iti agdama, dose kadagiti naitaray a pasaheros pakairaman ti driver ti bus ket agpapaagas paylaeng no sadino 11 kadagitoy ket adda idiay Baguio General Hospital and Medical Center (BGHMC) ken maysa idiay Agoo, La Union.
Iti kaudian a report, posible a maipasidung ti driver ti bus iti operasyon.
Maipalagip a pasado alas-8 ti rabii idi May 30, pababa ti ordinary bus idiay La Union bayat a maysa met a de-aircon a bus ti pasang-at iti siudad ti Baguio.
Nupay kasta, iti inisyal nga imbestigasyon, maatap a napukawan ti ordinary bus iti preno idi nadanonna ti sharp curve a paset ti kalsada rason tapno madungparna ti pasang-at a bus.
Nadungparna metlaeng ti ISUZU a lugan a sarsarunoenna sakbay a naidungpar daytoy iti concrete parapet ken natumba.
Dagos met a naitaray iti nagduduma nga ospital dagiti nadangran manipud iti dua a bus.
Rumrumwar pay iti imbestigasyon nga agarup 87 ti karga ti ordinary bus idi napasamak ti insidente ken 39 met ti pasaheros ti de-air a bus bayat a walo met ti pasaheros ti ISUZU a lugan, agpapada a saan a nadangran.
Maibasar iti datus, dua pulo a menor de edad dagiti karaman kadagiti pasahero nu sadino 2-anyos ti kaubingan. //Bombo Noveh Organo
