MT. PROVINCE –Pimmusay ti innem bayat a nadangran ti 17 nga indibidual kalpasan a natnag ti nagluganan dagitoy nga Elf truck iti Talubin-Barlig road, partikular iti Sitio Jakap, Talubin, Bontoc Mt. Province idi Martes, September 15, 2026.
Karaman kadagiti pimmusay ti 4-5 months a maladaga, uppat a babbae ken maysa a lalaki.
Nabigbigen dagiti biktima a buklen ti 11 a lallaki ken 12 a babbae ngem nagkedked dagiti otoridad a maipablaak ti pakabigbigan dagitoy.
Iti nasao a bilang, 13 ti minor de edad bayat 10 dagiti addaan iti umdas nga edad.
Iti exclusive a pannakiuman ti Bombo Radyo kenni Police Major Robert B. Sagandoy, Chief of Police ti Bontoc Municipal Police Station (MPS), kinunana agkakabagyan amin dagiti biktima a manipud sadiay Bakun, Benguet.
Iti inisyal nga imbestigasyon dagiti otoridad, dimmar-ay dagiti biktima iti kasar sadiay Isabela ken paawid dagitoy idiay Bakun idi natnag ti nagtuganan dagitoy iti mapattapatta a 100 meters ti kaunegna a rangkes.
Iti pannakiuman dagiti otoridad iti driver, kinunana a saan a kimmapet ti prino a posible a rason ti pannakatnag ti lugan.
Innayon ni Police Major Sagandoy nga overload ti nasao a lugan.
Iti agdama, agpatpattaming dagiti biktima iti Botoc General Hospital bayat a maiyawid sadiay Bakun ti bangkay dagiti biktima.
Agtultuloy latta ti imbestigasyon dagiti otoridad iti rason ti pannakatnag ti nasao a lugan.
Kabayatanna, impeksa ti Bontoc MPS ti pannakipagrikna dagitoy kadagiti maseknan a pamilya.
Agpalpalagip metlaeng ni PMajor Sagandoy kadagiti amin a motorista nangruna dagiti dulyasat iti Bontoc-Barlig-Natunin-Paracelis Road nga agannad nangruna ket prone ti nasao a kalsada iti slide ken nagalis gapu iti masansan a panagtudtudo iti nasao a lugar. //mp4
