BAGUIO CITY – Dinadael dagiti operatiba ti PDEA-Cordillera ken Cordillera Police ti dumanon P1-M a gatad dagiti marijuana sadiay Tulgao East, Tinglayan, Kalinga idi Lunes, September 7.
Nadiskobre dagiti iligal a mula iti tallo a pagmulaan nga addaan kalawa a 700 square meters.
Pakabuklan a 5,000 a fully grown marijuana plants ti nadadael iti nasao nga operasyon.
Naisayangkat ti marijuana eradication operation kasaruno ti panakadiskobre ti gandat a panangipatulod iti marijuana paruar iti Kalinga babaen iti maysa a courier company sadiay Tabuk City.
Patien ti PDEA-Cordillera a ti insidente ket panagpadas dagiti illegal drug traders a mangaramat kadagiti courier services kas wagas iti panangibiaheda iti adu a suplay ti iligal a droga kasaruno ti nairtengan a border control a nanglimitar iti garaw ti iligal a droga.
