BAGUIO CITY – Dinadael dagiti otoridad ti rinibribo a pinuon ti marijuana nga aggatad ti P10.74-M iti eradication operation nga insayangkatda kadagiti kabambantayan ti Bakun, Benguet idi Miyerkoles, November 25.
Nadiskobre ti tallo a pagmulaan nga addaan kalawa a nasurok 13,000 square meters sadiay Sitio Legab iti Barangay Kayapa.
Namulaan dagiti nasao a disso iti dumanon 52,200 a fully-grown marijuana plants ken 2,500 a marijuana seedlings.
Dagus nga inuram dagiti otoridad dagiti naparut nga iligal a mula malaksid laeng kadagiti inalada nga agserbi nga ebidensia.
Maibasar iti rekord ti Benguet Police Provincial Office, pito a marijuana eradication operations ti insayangkat dagiti otoridad iti probinsia a nagresulta iti panakadadael ti nasurok P13.81-M a gatad dagiti nasurok 71,000 a pinuon ti marijuana.
