BAGUIO CITY – Nangilatang ti Department of Agriculture (DA)-Cordillera ti nasurok P15-M a pondo para iti panakagatang dagiti feeds a maiwaras kadagiti agtartaraken ti baboy kas paset ti re-population program dagitoy.
Sigun kenni DA-CAR Regional Director Dr. Cameron Odsey, narugianen ti panangbigbigda kadagiti paraanak a baboy wenno breeder a maipaayan ti taraon tapnu masigurado a natalged iti African Swine Fever dagiti maipasngay a buryas.
Kinunana a naadaanda iti katulagan kadagiti hog growers a makaawatda iti libre a feeds para kadagiti tarakenda a baboy kasukat ti kondisyon a gatangen ti ahensiya dagiti maipasngay a buryas a maideklara kas ASF free tapnu agserbi a breeder.
Nupay kasta, inlawlawagna a dagiti laeng babbai a baboy ti gatangenda bayat a mailako iti merkado publiko dagiti lalaki a buryas wenno fattener tapnu matulongan dagiti breeders.
