BAGUIO CITY–Dinadael dagiti otoridad ti P2.64-M ti gatadna a mula a marijuana iti nagsina nga eradication operations sadiay Bakun ken Kibungan, Benguet idi kanikadua.
Immuna a pinarut dagiti otoridad ti 6,400 a dadakkel a pinuon ti marijuana nga aggatad iti P1.28-M manipud iti communal forest sadiay Kinmayad, Kayapa, Bakun.
Pinarut met dagiti otoridad ti 800 a dadakkel a pinuon ti marijuana nga aggatad ti P160,000 manipud iti maysa a parapubliko a lote sadiay Lamagan, Tacadang, Kibungan.
Nadiskobre pay dagiti otoridad ti 10 a kilo ti napagango a pinuon ti marijuana nga aggatad iti P1.2-M manipud iti kapada a disso sadiay Tacadang, Kibungan.
Inuram dagiti otoridad dagiti naparut ken nadiskobre nga iligal a mula ngem nagalada iti agserbi nga ebidensia.
Nupay kasta, awan ti natiliw a marijuana cultivator kabayatan ti nagsina nga operasyon.
