BAGUIO CITY – Mangidonar iti relief packs nga aggatad iti P260,000 dagiti liga ti assosasyon dagiti mannalon iti Benguet partikular dagiti stakeholders manipud iti La Trinidad Vegetable Trading Post kadagiti nagbalin a biktima ti bagyo nga Ulysses sadiay Cagayan.
Sigun kenni Agot Balanoy, representative ti liga ti assosayon dagiti mannalon iti Probinsya ti Benguet, naurnongda ti nasao a gatad manipud kadagiti stakeholders iti trading post iti uneg ti tallo nga aldaw.
Kinunana nga ingatangda amin daytoy kadagiti basic needs kas iti noodles, delata, kape ken tinapay.
Dinakamatna a panggepda lang koma a mangidonar iti nateng ngem gapu iti nangato a presyo dagiti nateng iti agdama ket nagdesisyonda nga agkolektar iti kwarta tapnu maigatang kadagiti kangrunaan a pagkasapulan dagiti biktima ti kalamidad.
Kinunana pay a naammuanda nga adu kadagiti nateng a naipatulod sadiay ti nadadael isut gapu a nagdesisyonda a baliwan ti immuna a plano dagitoy.
