Inbutaktak ti maysa nga empleyado ti contractor nga SYMS Construction idiay Sandiganbayan personalda a nangitulod iti agarup P299 million a cash a nakakabil iti kahon ti grocery boxes iti opisina ni sigud a Department of Public Works and Highways (DPWH) Assistant District Engineer Brice Hernandez.
Nabigbig ti testigo a ni Monica Ocampo-Santos, maysa liaison officer ti SYMS Construction.
Pinasingkedanna a ti nasao a gatad ket maatap a para iti lima a government infrastructure projects a nagun-od ti kumpanya aramat dagiti lisensya nga inpabulod ni Hernandez kadakuada.
Insalaysay ni Ocampo-Santos a P74 milyon manipud iti P299 milyon ket adda pakainaiganna iti ghost project nga aggatad iti P92.8 milyon idiay Pandi, Bulacan.
Inparangna metlaeng iti nasao a korte dagiti mensahe ti iskedyul ti panangitulod kadagiti kwarta iti sigud nga opisyal ti DPWH. //bombokaren.c.s
