BAGUIO CITY – Nangilatang ti Department of Education (DepEd) – Cordillera iti kanayonan a P30-M para iti insintibo dagiti mannursuro iti walo nga School Division Offices daytoy.
Sigun kenni Atty. Sebastian Tayaban, dadualo ti finance division ti DepEd-Cordillera, tunggal maysa kadagiti dumanon 17,300 a teaching personnel manipud iti kindergarten agingga Grade 12 iti rehion ket makaawat ti P1,500 nga insintibo.
Inlawlawagna a ti P1,000 ket insintibo manipud iti DepEd Central Office kas panangbigbigda iti awan sarday a panangisuroda kadagiti ubbing bayat a ti P500 ket kas medical examination allowance dagitoy.
Kinunana nga impalusposdan ti gatad kadagiti division offices ken mangamong metten dagitoy no kaano a maiwaras ti nasao nga insintibo kadagiti benipisaryo a mannursuro.
Innayon pay ni Atty. Tayaban nga ad-adalen ita ti DepEd Central Office no kasano a maipaayan iti communication allowance dagiti mannursuro tapnu matulongan dagitoy iti baro a wagas ti panagsuro ita a maipawil paylaeng ti face-to-face kadagiti estudyante.
