BAGUIO CITY – Nakemmeg ti tallo a drug couriers bayat a nakumpiskar kadakuada dagiti marijuana bricks nga aggatad ti P6.36-M iti interdiction operation nga insayangkat dagiti otoridad sadiay Sitio Finew, Samoki, Bontoc, Mountain Province idi kalman.
Nabigbig dagitoy a da Noli Bendoy Navalez, Wilfredo De Leon Magbanua Jr. ken Mary Grace Nepumoceno Lunas a bin-ig a residente ti Dasmariñas, Cavite.
Nakalugan dagitoy iti maysa a sedan ken paawidda sadiay Cavite babaen iti Bontoc-Banaue Road idi pinara dagitoy dagiti operatiba.
nakumpiskar kadagitoy ti 53 a marijuana bricks nga aggatad ti P6.36-M.
Sigun iti PDEA-Mountain Province, adda ti imet dagiti tallo a nagduduma a dokumento kas iti Authority to Travel, Medical Certificates ken Quarantine Passes a maatap nga inaramatda tapnu makalusotda kadagiti nainget a quarantine checkpoints manipud Cavite agingga Mountain Province.
Manarimaan metten ti panangberipikar dagiti otoridad iti kinabalido dagiti nasao a dokumento.
Sumangsango metten dagiti tallo iti kaso a panaglabsing iti Comprehensive Dangerous Drugs Act of 2002 ken maim-imbestigaranda iti posible a panaglabsing kadagiti quarantine protocols.
