Nasurok 39,200 a marijuana a mapatta-patta nga aggatad iti P7,840,000 ti nauram iti naisayangkat a tallo nga aldaw nga eradication campaign a naawagan nga “OPLAN DANUN” idiay Barangay Buscalan, Tinglayan,manipod Pebrero 27 agingga Marso 1, 2026.
Indauloan ti operasion iti nagduduma nga ahensia karaman ti Philippine Drug Enforcement Agency (PDEA)–Cordillera Kalinga Provincial Office, Philippine National Police Drug Enforcement Group–Special Operations Unit, PNP Special Action Force, 1503rd Mobile Company Regional Mobile Force Battalion, Tinglayan Municipal Police Station, ken Provincial Intelligence Unit/Drug Enforcement Unit.
Balligi a napirdi ti amin ti iligal a mula iti plantasion nga addaan iti kalawa a mapatta-patta a 2,800 metro kuadrado.
Numan pay awan ti nakemmeg a cultivator iti operasion, agtultuloy ti pannakikoordinar dagiti otoridad iti lokal a gobierno tapno maamuan ti agtagikua iti daga ken maamuan ti responsable iti panangimula iti marijuana.
