BAGUIO CITY – Nadadael ti P816-K a gatad dagiti pinuon ti marijuana iti tallo nga aldaw nga eradication operation nga insayangkat dagiti otoridad iti dua a munisipyo ti Benguet iti umuna a lawas ti baro a tawen, 2022.
Nadiskobre ti maysa a pagmulaan ti marijuana sadiay Poblacion, Bakun nga addaan kalawa a 400 metro kwadrado.
Pinarut dagiti otoridad ti 1,600 a puon ti marijuana nga aggatad ti P320-K.
Nadiskobre met ti uppat a pagmulaan ti marijuana sadiay Tacadang, Kibungan nga addaan ti pakabuklan a kalawa a 620 metro kwadrado.
Pinarut dagiti otoridad ti 2,480 a puon ti marijuana nga aggatad ti P496-K.
Nauram metlaeng dagiti marijuana iti nakaparutan dagitoy a disso.
Manarimaan met ti imbestigasyon tapnu mabigbig dagiti nagimula ken mangtartaripato kadagitoy.
