Inwaragawag ni President Ferdinand Marcos Jr. a nakaala iti Pilipinas iti agarup US$2.5 billion manipud kadagiti kompania idiay Canada iti sektor ti panagminas, enerhia, IT ken business process management, ken digital economy.
Iti official visitna idiay Canada, nakipagkita ti Presidente kadagiti sumagmamano a dadakkel a kompania iti nasao a pagilian a makatulong unay tapno ad-adda a dumakkel ti ekonomia ti pagilian.
Impaganetget pay iti Malacañang nga agtultuloy ti negosasion para iti posible a free trade agreement iti nagbaetan ti dua a pagilian, a panggepna nga ad-adda a mapapigsa ti ekonomia ti agsumbangir a nasion.
Natalantan metlaeng iti official visit iti Presidente ti posibilidad ti artificial intelligence hubs ken training centers iti pagilian tapno papigsaen ti AI workforce ti pagilian.
Dinayaw ni PBBM ti agtultuloy a suporta ti Canada iti rules-based international order ken UNCLOS nangnagruna iti isyu ti West Philippine Sea.
Immuna nga inwaragawagna a naipangato ti relasion ti Pilipinas ken Canada iti strategic partnership kalpasan ti opisial a panagbisitana.
Sigun kenkuana, napagnunumuan ti naun-uneg a panagtitinnulong ti dua a pagilian iti seguridad, komersio, enerhia, teknolohia, ken dadduma pay a sektor a kadwa ni Canadian Prime Minister Mark Carney, kasta met dagiti nadumaduma nga opisyales ken businessman.//BomboKhey
