BAGUIO CITY – Kidkiddawen dagiti stakeholders iti La Trinidad Vegetable Trading Post ti panakaisubli dagiti pagalagadan a naipatungpal sadiay idi naipasidong ti La Trinidad iti enhanced community quarantine (ECQ).
Iti interview ti Bombo Radyo Baguio kenni Agot Balanoy, panakabagi ti liga dagiti asosasyon iti nasao a trading area, kinunana a nagsuratda iti lokal a gobyerno ti La Trinidad para iti nasao a kiddaw kasaruno ti panagpositibo iti COVID-19 ti maysa a truck helper sadiay.
Dinakamatna nga iti panakaipasidong ti La Trinidad iti modified general community quarantine (MGCQ) ket nawaswas wenno naikkat dagiti dadduma a paglintegan iti trading areas.
Gapu iti daytoy, iyap-apelada ti panakaisubli ti panakasukimat ti entrace ti La Trinidad Vegetable Trading Post ken ti panaka-istrikto ti ‘no touch down policy’ kadagiti drives ken helpers ken amin dagiti nagtaud iti NCR wenno kadagiti lugar sadiay lowland a nakailista iti positibo a COVID-19.
Innayon ni Balanoy a napagnumuan dagiti operators ken owners dagiti pribado a trading areas sadiay La Trinidad ti panangisubli dagitoy kadagiti paglintegan a sinurotda kabayatan ti ECQ iti baet a naka-MGCQ ti munisipyo.
Dinakamatna nga ipatungpalen dagiti pribado a vegetable trading areas ti physical distancing kadagiti mannalon, malimitaran dagiti mapastrek a tattao ken regular ti disinfection iti entrance dagitoy.
