BAGUIO CITY – Narekober ti maysa a paltog iti maysa a panganan sadiay Km. 5, Pico, La Trinidad, Benguet idi kanikadua.
Maibasar iti report ti La Trinidad PNP, nakaawatda iti tawag manipud iti waitress ti nasao a panganan seknan iti nasarakan a paltog.
Kinuna ti waitress a nakitana ti maysa nga sling bag kabayatan ti panagdalusna iti maysa kadagiti lamisaan iti panganan.
Kinunana a nadlawna nga adda ti paltog a linaon ti nasao a bag isut gapuna a dagus nga inyumanna daytoy kadagiti pulis.
Impaimana kadagiti pulis ti nasao a bag ken iti panagsukimat dagiti pulis ket nakitada ti caliber 45 a paltog, walo a bala ken maysa a blue a pantalon.
Naipaima ti paltog iti kostudiya ti Crime Laboratory Office ti Benguet PNP ken mareprepaso ti video footage ti CCTV camera a nakamuntar iti asideg iti ayan ti nasao a panganan para iti panakabigbig ti akinkukua iti nasao nga sling bag. (-with Bombo Nikki Agsiweng)
