BAGUIO CITY – Nadangran ti uppat nga indibidual iti panatnag ti maysa a lugan iti rangkis sadiay Tapaw, Chupac, Barlig, Mt. Province idi malem kalman.
Nabigbig ti driver ti nasao a lugan a ni FO1 Julio Bilog Jr., 31-anyos, kameng ti Bureau of Fire Protection ken residente ti Tetep-an, Sagada, Mt. Province.
Nabigbig met dagiti pasahero a da Verlee Mae Bilog, 27-anyos, asawa ti bombero; Julia Eveleigh Bilog, 2-months old ken ni Leoncio Longan, 24-anyos.
Naduktalan iti imbestigasyon a paturong dagitoy sadiay Natonin, Mt. Province idi napasamak ti insidente.
Mapattapatta a 40 a metro ti kauneg ti rangkis a nakatnagan ti lugan a maysa a trooper.
Naiturong dagiti biktima iti Barlig District Hospital para iti panakatamingda ngem naiyakar ti ubing iti Luis Hora Regional Memorial Hospital para iti kanayonan nga obserbasyon.
Dukduktalen met dagiti otoridad iti rason iti napasamak nga aksidente.
