Maisingsingasing a maipasidong iti otopsiya ti bangkay ni Mark Dave Galario Valdez, ti nauram a lalaki a nasarakan iti igid ti kalsada idiay Barangay Quirino, Bacnotan, La Union idi Hulyo 2.
Daytoy ti kinuna ni Dr. Andy William Mendoza, Municipal Health Officer ti Bacnotan Municipal Health Office, ti nangideklara a dead-on-the-spot ni Valdez.
Maibasar iti imbestigasyon ti Scene of Crime Operations team iti Regional Forensic Unit 1 nga indaulwan ni PLT. Elmer Dilan, naduktalan ti tallo a pammagsol iti makinkanawan a luppo ti biktima nu sadino maatap nga icepick ti naaramat iti daytoy.
Nagsagrap pay ni Valdez ti dunor iti muging ken likod ti ulo-na.
Maipalagip a nasarakan ti 21-anyos nga Engineering student babaen kenni Hermin Pascual Geronimo, 56-anyos a truck driver iti igid ti kalsada.
Ni Valdez ket estudyante ti University of the Cordilleras iti Baguio City.
Iti agdama, hustisya ti ipukpukkaw dagiti pamilya ni Mark Dave Galario Valdez.
Manarimaan ti nainget nga imbestigasyon dagiti maseknan nga otoridad para iti panakaduktal ti motibo ken pakabigbigan dagiti suspek iti nasao nga insidente.//Via Bombo Radyo La Union
