Rumrumuar iti imbestigasion ti Department of Education (DepED) a posible a planado ti napasamak a pammaltog iti maysa a pagadalan idiay Tacloban City a nakatayan ti uppat ken pannakadangran ti 20 nga estudiante.
Sigun kenni Education Secretary Sonny Angara, impakammo ti maysa nga adviser a natatalna ken saan a sinumsumrek iti agarup maysa a lawas ti maysa a suspek sakbay a napasamak ti insidente.
Innayon ni Angara nga adda ti impormasion a posible nga adda ti group chat dagiti suspek ken inawaganda a “mission” ti inaramid dagitoy.
Inyunay-unay ti opisial nga iti baet a saan paylaeng a pinal daytoy a konklusyon, rumrummuar a posible nga insaganaan dagiti suspek ti insidente.
Kabayatanna, impanamnama ti DepEd a mangipaayda iti dagus a psychosocial support kadagiti mannursuro ken personnel ti pagadalan.
Mangituding metlaeng dagitoy iti guidance counselor a tumulong kadagiti apektado nga estudiante.
Agtultuloy paylaeng ti imbestigasion dagiti otoridad bayat nga adda iti kustodiya ti Tacloban City Social Welfare and Development Office ti dua a suspek nga agtawen ti
14 ken 15.//mp4
