Inaklon iti dadaulo iti transport group a Baguio-Benguet Jeepney Federation a kurang ti matgedanda iti panagpasada iti agdama gapu iti agtultuloy a panagngato iti presio iti produkto a petrolio.
Iti pannakiuman iti Bombo Radyo kenni Wilson Bumay-et, Presidente iti Baguio-Benguet Jeepney Federation, kinunana a dakkel ti panagbaliw iti pammastrekanda nu idilig iti sigud ken iti agdama.
Kinunana a sigud ket umdas paylaeng ti kitada para iti pamilia, ngem saanen iti kaso iti agdama. Adda pay dagiti naipadamag a saan a nakadanon iti manamnama a kitada.
Sigun pay kenkuana, iti maysa nga aldaw a panagpasada, ti maaw-awat dagiti drayber ket dumanon ti P300–P500 laeng, ken nu dadduma ket awan pay ti maawatda.
Iti agdama, ad-adalenda paylaeng ti posible nga addang nga aramidenda nangruna nu dumanon iti P120 wenno nasurok pay ti presio iti tunggal litro iti produkto a petrolio. Iti siudad ti Baguio, ti presio iti agdama iti tunggal litro ket agay-ayam iti P100 agpangato.
Iti panagtaripnong a naisayangkat iti nagbaetan iti Baguio City Council ken iti Baguio-Benguet Jeepney Federation, impakaamo ni Bumay-et nga adda ti ipaay nga ayuda iti LGU Baguio para iti transport sector, a dakkel ti panagyamanda.
Sigun kenkuana, agtaud ti ayuda manipod iti City Mayor’s Office ken CSWDO. Iti agdama, manarimaan paylaeng ti panangisubmitirda kadagiti requirements ken nagan iti City Engineering Office tapno maamuan ken ma-access nu mano ti agbalin a benepisiario. Saanen a nadakamat ni Bumay-et nu mano ti maawat dagiti drayber a cash assistance.
