BAGUIO CITY – Iyap-apela ti mayor ti Baguio ti panag-anus dagiti umili ti siudad a nakapila para iti panagbakuna kontra iti COVID-19 kagiddan ti panag-uray ti lokal a gobyerno iti panagsangpet ti kanayonan a COVID-19 vaccines.
Iti agdama, awan pay ti naituding a vaccination schedule para iti first dose ditoy siudad gaputa naibusen ti suplay ti bakuna kontra iti COVID-19 para kadagiti umawat iti first dose.
Sigun kenni Mayor Benjamin Magalong, mangnamnamada nga iti kabiitan a panawen ita a bulan sumangpeten ti namnamaen ti nasyonal a gobyerno a suplay ti nagduduma a brand ti bakuna kontra iti COVID-19.
Mangnamnama pay daytoy a dakkel metlaeng ti maala ti siudad a bingay nangruna ta nairaman ti Baguio kadagiti lugar a nasken a maipangruna iti panagbakuna kontra iti coronavirus.
Innayonna nga ita a bulan ket posible a sumangpeten ditoy siudad ti 11,000 doses manipud iti 190,000 doses ti bakuna kontra iti COVID-19 a ginatang a mismo ti lokal a gobyerno ti Baguio ken inton sumaruno a bulan ti Agosto ket posible a sumangpet met ti kanayonan nga agarup 18,000 doses.
Maibasar iti kaudian a datus ti City Health Services Office, idi Lunes, July 5 ket agarupen iti 72,000 a residente ti Baguio ti nabakunaan kontra iti COVID-19 para iti umuna a dose bayat a nasurok 25,700 kadagitoy ti nakaawat iti maikadua a dose.
