Imbaga ti Commission on Filipino Overseas (CFO) a nasken nga agatendar iti counseling program ti gobyerno dagiti Pilipino a naki-asawa wenno makiasawa iti foreigner tapno matulongan dagitoy a mang-am-ammo iti baro nga aglawlaw dagitoy.
Kasaruno pailaeng daytoy ti ipupusay ti maysa a Pilipino a ni Marvil Facturan-Kocjani kalpasan a pinapatay ti asawana nga Slovenian.
Sigun iti CFO, ti Guidance and Counseling Program (GCP) ket nabukel tapno mapakaammoan dagiti Pilipino maipapan kadagaiti posible a mapasaranda iti dadduma a pagilian kas iti cultural differences, language barriers, domestic violence ken human trafficking.
Babaen iti daytoy ket maipaayan iti ideya dagiti Pilipino nu kasanuda a maliklikan dagitoy a parikut ken nu anya dagiti mabalin nga aramidenda iti kanito a mapasarakanda dagiti nadakamat a parikut.
Impalagip met ti nasao a komisyon kadagiti Pilipino nga agpaplano a makiasawa iti foreigner ken permante nga agnaed iti dadduma a pagilian a nasken nga agparehistro ken agtulnogda kadagiti requirements ti Bureau of Immigration.
Maipalagip nga idi Enero 11 ket naipadamag ti ipupusay daydi Marvil Facturan-Kocjani kalpasan a mapapati a binagbagsol ti asawana a foreigner idiay Bled, Slovenia.
Impanamnama met ti Department of Foreign Affairs ti dagus a pannakaiyawid ti bangkay ni Marvil iti pagilian gapu ta agtultuloy ti koordinasyonda iti embahada ti Pilipinas idiay Vienna ken dadduma pay a maseknan nga ahensiya.
