BAGUIO CITY – Saan pay nga ibalbalakad ti lokal a gobierno ti Itogon, Benguet ti panag-home quarantine dagiti asymptomatic a pasiente ti COVID-19 sadiay.
Iti panakiuman ti Bombo Radyo Baguio kenni Mayor Victorio Palangdan, daytoy ket gaputa umdas dagiti isolation, treatment ken quarantine facilities ti munisipyo a mang-akomodar kadagiti amin a pasiente sadiay a nakaptan ti coronavirus.
Dinakamatna a tunggal pasilidad ket mabalin a maka-akomodar ti nasurok 40 nga indibidual malaksid pay kadagiti ospital a pakaiturturongan dagiti pasiente a makapaspasar ti nakaro nga epekto wenno sintomas ti COVID-19.
Imbinglayna nga iti agdama ket 33 nga indibidual ti naka-quarantine iti tallo a pasilidad sadiay Itogon.
Maipalagip a mangrugi ita nga aldaw, September 8, 2021 ti panakaipasidong ti probinsia ti Benguet iti General Community Quarantine kas maitunos iti reclassification ti National Inter-Agency Task Force.
