Temporaryo nga iparit ti Department of Agriculture(DA) ti panag-import ti live cattle ken daduma pay a by-products daytoy manipod United Kingdom tapno maliklikan ti panagwaras ti Bovine Spongiform Encephalopathy(BSE) wenno ti maaw-awagan a mad cow disease.
Sigun iti Department of Agriculture(DA), mabalin a makaitunda ti nakaro a nerve damage kadagiti baka ti nasao a sakit ken mabalin metlaeng a makaipaay ti sakit kadagiti tao daytoy a maobserbaran babaen iti brain shrinkage ken deterioration.
Nupaay kasta, akseptaren paylaeng ti pagilian ti nasao a produkto nga addan iti transit laketdi napataud ken naparti daytoy sakbay idi April 10.
Kagiddan dayta, impetteng met ti nasao nga ahensya a mangipatungpal daytoy ti naing-inget nga inspeksyon kadagiti panagsangpet dagiti karne ken daduma pay a by-products a nagtaud iti baka, kasta metten dagiti sibibiag ken bovine processed animal proteins tapno maprotektaran ti nasao a livestock industry iti pagilan.
Kabayatanna, naaramid ti nasao nga addang kasaruno ti panangipakaammo ti British authorities seknan ti panagraira ti nasao a sakit ti ayop.
