BAGUIO CITY – Immado manen ti kaso ti COVID-19 kadagiti agtatrabaho iti banking sector ditoy siudad ti Baguio.
Sigun kenni Dr. Donabel Tubera-Panes, dadaulo ti Infectious Disease Cluster ti City Health Services Office, nailista ti 17 a baro a kaso ti COVID-19 kadagiti agtatrabaho iti bangking sector ti siudad.
Dinakamatna a dagitoy ket agnanaed ken mangmangged iti Metro Baguio ken naobserbaran ti nasao a panagngato iti kaso ita a bulan.
Kinuna met ni Mayor Benjamin Magalong a ti nasao a clustering ket mangipaspasimudaag iti manamnama manen a panagngato ti kaso ti COVID-19 iti Metro Baguio.
Innayonna a nasken nga adda dagiti naing-inget pay nga addang nga aramiden dagiti lokal a gobyerno iti Baguio City, La Trinidad, Itogon, Sablan, Tuba and Tublay wenno BLISTT Area tapnu mapaksiaten ti panagwaras ti COVID-19.
