BAGUIO CITY – Aw-awisen ti Land Transportation and Franchising and Regulatory Board (LTFRB) – Cordillera dagiti interesado a jeepney drivers ken kameng ti pamilyada ken dadduma nga stakeholders a posible a maapektaran iti Public Utility Vehicle Modernization Program tapnu agaplikarda iti Tsuper Iskolar ti Technical Education Skills and Development Authority (TESDA).
Sigun kenni Engr. Elmer Mendoza, focal person ti LTFRB para iti Tsuper Iskolar, daytoy ket maysa a technical-vocational (tech-voc) scholarship program iti nagbaetan ti TESDA ken ti Department of Transportation a mangsuportar kadagiti mapukawan ti pagbiagan wenno maapektaran iti modernization program.
Kinunana a 25 nga slots ti nailatang para iti Baguio City para iti kurso iti bread and pastry production, slaughtering operations ken security services malaksid pay iti 50 slots para iti cookery.
Innayonna nga iti Benguet, partikular iti La Trinidad ket nakalukat ti sag-25 nga slots para iti heavy equipment operations iti bulldozer, hydraulic excavator ken wheel loader ken iti shielded metal arc welding.
Kwalipikado nga agaplikar ditoy dagiti naawanan ti pagbiagan gapu iti modernization program, dagiti stakeholders iti transport industry a boluntaryo a pimmanaw, dagiti stakeholders a nagdesisyon nga agtuloy iti transport industry, dagiti baro nga stakeholders iti transport industry ken dagiti kameng ti pamilya dagiti apektado nga stakeholders agingga iti maikatlo a lebel ti consanguinity wenno affinity.
Maipaayan dagiti kwalipikado nga aplikante iti libre nga skills training ken libre nga skills assessment nga addaan ti training support fund a katukad ti P350 nga agserbi a food and transportation allowance malaksid pay iti libre nga entrepreneurship training.
