BAGUIO CITY – Naduktalan iti panagwanawan ti Land Transportation Office (LTO) – Cordillera a kadawyan a panaglabsing dagiti driver iti rehion ket ti saanda a panagaramat ti seat belt.
Sigun kenni Francis Ray Almora, Regional Director ti LTO-Cordillera, dimmanon iti 2,510 ti nailistada a naglabsing iti nasao a pagalagadan.
Innayonna a dimmanon met iti 564 a motorista ti naipaayan ti citation ticket kalpasan a napaay dagitoy a nangiparang ti driver’s license ken OR-CR ti luganda.
Maibasar pay iti datus ti ahensia, agarop 500 a driver ti natiliwda gapu iti panagmaneho dagitoy iti saan a rehistrado a lugan bayat a nasurok 400 ti nakemmeg gapu iti reckless driving.
Innayona a naobsebarana ti ado a bilang dagiti motorista nga agibibiyahe ti depektibo a lugan malaksid pay kadagiti kaso ti saan a naurnos a panakaimuntar dagiti plate stickers, smoke belching, riders a saan nga agisusuot ti helmet ken dadduma pay a panaglabsing.
Iti pakabuklan ket dumanon iti 5,630 ti nakemmeg a motorista manipud nangrugi ti agdama a tawen.
Impetteng pay ni Almora patas ti panangtiliwda kadagiti naglabsing a motorista ken awan ti pabpaboranda kadagiti iyem-implementarda a pagalagadan. (with Bombo Janice Juanito)
