BAGUIO CITY – Agtaltalinaed a natibker dagiti personnel ti Public Order and Safety Division (POSD) ti lokal a gobyerno ti Baguio City iti baet dagiti sangsangwenda a kontrobersia.
Iti panakiyuman ti Bombo Radyo Baguio kenni POSD Deputy Chief Daryl Kim Longid, nababa ita ti kredibilidad ti opisinada gapu paylaeng iti nagsaruno nga isyu iti panang-tiket ti maysa a kadwada iti maysa a visually impaired a nag-jaywalk iti maysa a kalsada ditoy siudad ken ti naalaan ti video a nabara a diskusyon da POSD head Marvin Hererra ken ti maysa a vendor iti merkado publiko.
Nupay kasta, kinunana nga ur-urayenda paylaeng dagiti kongkreto nga ebidensia seknan kadagiti nasao nga isyu.
Inlawlawagna manen a namimpat a daras a binagbagaan ti POSD enforcer ti nasao nga indibidual ken ti kadwa daytoy a maipawil nga agballasiw iti nasao a disso ngem saan a dimngeg dagitoy a nangitunda iti panaka-tiket-da.
Kinunana a ti garaw ti nasao nga indibidual ket saan a maiyannatop iti garaw ti maysa a PWD kagiddan ti panangipettengna a nasken a saan nga agbalin a rason dagiti PWDs ti sakit dagitoy tapno mailaksidda kadagiti paglintegan ti Baguio.
Innayon pay ni Longid a para metlaeng ti pagsayaatan dagiti nasao nga indibidual ti inaramid dagiti personnel ti POSD.
