BAGUIO CITY – Agtalek latta ti Philippine Drug Enforcement Agency (PDEA)-Cordillera nga agbalin a drug free ti rehiyon sakbay nga agleppas ti termino ni Presidente Rodrigo Duterte.
Sigun kenni PDEA-Cordillera Regional Director Gil Castro, babaen iti nainget a pannakaipatungpalda iti operasyon kontra iti iligal a droga ket in-inot a magun-od ti nasao a pakaseknan.
Maibasar iti datus ti ahensia manipod iti nasurok 100 a barangay iti rehiyon ket 60% kadagitoy ti nadalusanen kontra iti iligal a droga.
Manipod metlaeng iti nasao a bilang dagiti barangay 20-agingga 30% dagiti unaffected a babbarangay bayat a ti nabatbati a porsiento ket madaldalusan paylaeng wenno daldalusan payleng ti PDEA-Cordillera.
Iti metlaeng datus, adda pay ti 14 a barangay iti Baguio City ti madaldalusan kontra iti iligal a droga;nasurok 10 met sadiay Kalinga; nasurok 15 sadiay Abra bayat nga awan metten sadiay Mt. Province ken Ifugao.
Maipaspasidong met iti re-validation dagiti kamaudian a naideklara kas drug-free barangay tapnu masigurado ti pannakadalus dagitoy kontra iti iligal a droga.
Kagiddan iti dayta, pinagyamanan met ni Director Castro ti siento-porsiento a panangsuportar dagiti nagduduma nga local government units iti rehiyon iti kampanya ti PDEA kontra iti iligal a droga.
VC CASTRO (PDEA CORDILLERA REGIONAL DIRECTOR GIL CASTRO)
