BAGUIO CITY – Impaayen ni Land Transportation Franchising and Regulatory Board (LTFRB) – Cordillera regional director Engr. Lalaine Sobremonte ti prangkisa ken pammalubos iti panagbiahe ti maikatlo a transport cooperative a paset ti Public Utility Vehicle Modernization Program ti gobyerno.
Gapu iti daytoy, agbiahen iti ruta nga Ambayao-La Chesa, NHA Cypress iti Barangay Irisan ditoy Baguio City ti 15 nga yunit ti Class 2 a moderno a jeep ti Baguio Benguet Transport Cooperative.
Mangnamnama met ti kooperatiba a maserbisyoanda dagiti residente nga agnanaed kadagiti nasusulinek a paset ti Barangay Irisan.
Iti panagbitla ni Engr. Sobremonte, kinunana nga iti agdama ket dua paylaeng a transport cooperatives iti Cordillera ti naipaayan ti pammalubos nga agrugi ti operasyon iti moderno a jeep.
Innayonna a daytoy ti mangipaspasimudaag nga in-inoten ti panakaimplementar ti Public Utility Vehicle Modernization Program iti rehion Cordillera.
Nakaawat pay ti nasao a transport cooperative iti kablaaw manipud kadagiti nagduduma nga opisyales ti gobyerno gapu iti panagbalinda a maysa kadagiti pioneer cooperatives iti panakaimplementar ti modernization program kadagiti parapasahero a lugan iti pagilian.
