BAGUIO CITY – Guyguyuguyen ni Baguio City Mayor Benjamin Magalong dagiti operators ken drivers dagiti public jeepneys (PUJs) iti syudad iti strikto a panagtungpalda iti ordinansa a mangikalkalikagum iti panagbyahe dagitoy agingga alas dies iti rabii.
Kasaruno daytoy dagiti reklamo a maaw awatna seknan iti nasapa unay a pannagawid dagiti drivers wenno kinaawan dagiti agbyahe a jeep iti alas otso ti rabii.
Sigun ken Magalong, nasken a panunuten nga adda dagitoy iti public utility sector ken ti prayoridad ket iti panagserbi iti publiko iti baet ti saan a napintas a sitwasyon a kas iti nangato a presyo ti krudo ken parikot iti trapiko nga ikagkagumaanda a solbaren
Maibasar iti Ordinance 133 series of 2018, mailaylayon iti panagbyahe dagiti PUJs agingga iti alas dies ti rabii manipod iti sigud nga alas nuebe ti rabii.
Babaen pay iti ordinansa, maikalikagum kadagiti amin a jeepney operators ken drivers associations nga ag op-operate iti syudad malaksid kadagiti inter-municipality jeepneys tapnu mintinarenda nga available dagiti jeepney para kadagiti pasaheros iti alas otso ti rabii agingga iti alas dies ti rabii.
