Naitantan ti agtultuloy nga imbestigasion ti House Quad Committee seknan iti pimmusay nga indibidual gapu iti iligal a droga iti administrasion ni sigud a President Rodrigo Duterte a naituding kuma inton Nobiembre 21.
Daytoy ti kinumpirmar ni Quad Committee lead chairman Ace Barbers ngem saanna pay nga inlawlawag ti rason ti pannakaitantan ti panagdinggeg.
Sigun met kenni House Deputy Majority Leader Paolo Ortega V ti La Union, manarimaan paylaeng ti panagsarita dagiti kakaduana nga opisial ti petsa ti sumaruno a panagdinggeg.
Maipalagip nga immuna nga inwaragawag ti QuadComm ti pannakaitantan ti Nobiembre 13 a panagdinggeg iti tengnga ti agtultuloy a panagberipikar dagiti testimonia dagiti saksi.
Nupay kasta, naituloy latta ti panagdinggeg tapno maakomodar ti kaadda ni Duterte, a naglugan iti eroplano manipud iti ilina a Davao City.
