Guyguyugoyen ti Overseas Workers Welfare Administration dagiti overseas Filipino workers nga agkammangda kadakuada nu adda ti parikut dagitoy.
Kasaruno daytoy ti naipadamag nga ipupusay ti 27-anyos a Filipina domestic helper kalpasan a maatap a nagsuicide idiay Hongkong idi Abril 13.
Maibasar iti report, ti biktima ket ni R.D.A, single mother, addaan ti dua nga anak manipud Luna, La Union.
Nasarakan ti bangkay daytoy iti uneg ti balay ti employerna idiay Tsuen King Circuit, Tsuen Wan.
Maatap a nagkettel iti bukod a biag ti biktima gapu ta nadanunan dagiti otoridad a nakabitin babaen ti leather belt.
Iti inisyal nga imbestigasyon, adda ti sangsangoen ti biktima a relationship problems.
Maipalagip nga idi metlaeng Marso 18 ket adda ti Filipina a nagbitin babaen ti scarf iti uneg ti pagtaengan ti employerna iti Allway Gardens idiay Tsuen Wan ngem saan a nadakamat ti eksakto a rason.
Gapu iti daytoy, maguyguyogoy dagiti OFW a mangkontak kadagiti sumaganad a hotline nu adda ti nadagsen a parikut dagitoy.
Overseas Workers Welfare Administration – 6345 9324
The Mission for Migrant Workers – 9529 2326.
