BAGUIO CITY – Rumrumwar iti datus ti National Police Commission (NAPOLCOM) a kadawyan a kaso a maipipila kontra kadagiti kameng ti Police Regional Office Cordillera (PROCOR) ita a tawen ket panaglabisng iti RA 9262 wenno ti Anti-Violence Against Women and Their Children (VAWC) Act of 2004.
Sigun kenni NAPOLCOM-Cordillera Regional Director Editha Puddoc, dumanonen iti lima a pulis iti Cordillera ti napilaan ti panaglabsing iti Anti-VAWC manipud iti walo a bilang dagiti pulis a napilaan ti kaso ita.
Dinakamatna a ti dadduma a kaso ket panaglabsing iti Anti-Bouncing Checks Law ken panagtakaw.
Inyunay-unayna a dagiti kaso a sangsangwen dagiti pulis ti Cordillera ket awan pakainaiganna iti panangaramid dagitoy iti mandato, trabaho ken responsibilidadda kas maysa a panakabagi ti linteg.
Naamuan pay kenkuana nga adda metlaeng ti lima a pulis iti Cordillera a napilaan ti kaso a panaglabisng iti Anti-VAWC idi napalabas a tawen.
VC PUDDOC
Impanamnama met ni Puddoc ti panangsango dagiti pulis ti rehion iti aniaman a kaso wenno panaglabsing a naaramid dagitoy babaen iti umno a proseso.
Maipalagip a nabigbig ti PROCOR kas “Home of the Most Disciplined Cops” iti pagilian gapu iti panagbalin dagitoy a disiplinado ken gapu iti napintas a serbisyo nga ipapaayda kadagiti umili.
