Agtultuloy latta ti panagmonitor ti Presidential Anti-Organized Crime Commission (PAOCC) kadagiti 58 a maatap nga agop-operate a Philippine Offshore Gaming Operators iti baet a kinanselar ti gobierno ti licensya dagitoy.
Kinuna ni Presidential Anti-Organized Crime Commission spokesperson Winston Casio, nga agtultuloy ti panagmonitor dagitoy kalpasan ti naawat dagitoy a report mainaig iti iligal nga operasyon.
Dagiti imonmonitor dagitoy ket pakairamanan ti Pampanga, Cavite, Laguna, Palawan ken Cebu.
Impasigurado ni Casio ti naan-anay a panagregget dagitoy tapno malapdan dagiti iligal nga operasyon.
Sigun iti Presidential Anti-Organized Crime Commission 49 laeng ti ligal Philippine Offshore Gaming Operators nga agop-operate iti pagilian.
Gapu iti daytoy, kidkiddawen kadagiti local government units ti tulong dagitoy babaen iti panangsukimatda kadagiti iligal nga agop-operate a negosyo iti pagilian.
Kabayatanna, maipalagip nga immunan nga inyebkas ti China ti suportarda iti Pilipinas no sadino immapela dagitoy para iti pannakaipawil ti Philippine Offshore Gaming Operators (POGO).//Rose
